Freyja svarar á íslensku
Raddmennið Freyja, sem hefur svarað símtölum hjá Sjóböðunum í Hvammsvík, er nú farið að spjalla við viðskiptavini á íslensku. mbl.is greindi frá. Hingað til hafði Freyja svarað á ensku í síma, þótt hún gæti svarað á íslensku í tölvupósti og spjalli.
Samkvæmt tilkynningu frá Menni er Freyja þar með fyrsta raddmennið sem talar íslensku. Hún hefur leyst úr um 70% símtala og sendir flóknari erindi áfram til starfsfólks í þjónustuveri Hvammsvíkur.
Fyrst um sinn svarar Freyja algengustu spurningunum, en með tímanum á hún einnig að geta veitt rauntímaupplýsingar, til dæmis um laus pláss í sjóböðunum og veðrið í Hvammsvík.
Í umfjölluninni segir Skúli Mogensen, stofnandi Hvammsvíkur, að vel fari á því að Freyja fari af stað í viku íslenskunnar og að nýjungar af þessu tagi geti hjálpað til við að varðveita íslenskuna. Róbert Híram, tæknistjóri Menni, segir fyrirtækið stefna að því að innleiða fleiri sambærileg raddmenni.